Të dhëna të përgjithshme
Zona Gjeografike: Bashkia e Selenicës kufizohet në veri me bashkinë Fier, në lindje me bashkinë Mallakastër, Tepelenë dhe Memaliaj, në jug me bashkinë Himarë dhe perëndim me bashkinë Vlorë. Kryeqendra e Bashkisë është qyteti i Selenicës.
Popullsia: Sipas Censusit të vitit 2011, zona e bashkisë së re Selenicë ka një popullsi prej 18.476 banorësh ndërsa në Regjistrin Civil rezulton me 35.793 banorë. Dallimi i madh mes shifrave të regjistrit civil dhe të censusit flet për një shkallë të lartë emigrimi. Bashkia e re ka një sipërfaqe prej 561.24 km2. Sipas të dhënave të censusit, bashkia e re ka një densitet prej 32.9 banorësh për kilometër katror ndërsa sipas regjistrit civil, densiteti është 63.77 banorë/km2.
Kjo bashki përbëhet nga 6 njësi administrative, të cilat janë: Selenicë, Armen, Vllahinë, Kotë, Sevaster dhe Brataj. Të gjitha njësitë administrative janë aktualisht pjesë e rrethit të Vlorës dhe qarkut të Vlorës. Bashkia e re ka nën administrimin e saj një qytet dhe 47 fshatra. Për të parë listën e plotë të qyteteve dhe fshatrave të kësaj bashkie, klikoni këtu
Profili i bashkisë
Bashkia e re e Selenicës shtrihet në një zonë kodrinore në bregun e majtë të lumit Vjosa si dhe përgjatë lumit Shushicë, i cili është tributar i Vjosës. Bashkia e re ka në territorin e saj minierën historike të bitumit në Selenicë, ku punësohen edhe banorët e fshatrave përreth, si dhe zonën naftëmbajtëse të Vllahinës ku nafta është drejt shterimit duke lënë pas një zonë të madhe të ndotur.
Bashkia e re përbëhet nga disa komuna të cilat nuk kanë lidhje organike me qytetin e Selenicës, si dhe nuk kanë lidhje të drejtpërdrejtë rrugore me këtë qytet, duke vështirësuar në këtë mënyrë komunikimin mes tyre.
Bujqësia dhe blegtoria është aktiviteti kryesor ekonomik i bashkisë së re, popullsia e të cilës bazohet veçanërisht shumë te remitancat nga emigracioni për të siguruar të ardhurat e saj.
Si zonë bujqësore, bashkia e re është e lidhur ngushtë me bashkinë e Vlorës, si treg i rëndësishëm për produktet e saj.
Sfidat me të cilat do të përballet pushteti vendor pas ndarjes së re
Ndotja mjedisore në zonën e Vllahinës e shkaktuar nga industria e naftës, zhvillimi i infrastrukturës ndërlidhëse të komunave përbërëse me qytetin e Selenicës, si dhe zhvillimi i bujqësisë dhe blegtorisë identifikohen si sfidat kryesore të bashkisë së re.
Rehabilitimi i territorit të ndotur nga nafta dhe nga gazi është një proces i kushtueshëm që sugjerohet se duhet të kryhet nga pronari i këtyre puseve, kompania shtetërore e naftës Albpetrol.
Si zonë kodrinore me klimë të butë, Selenica dhe komunat përbërëse janë zonë e përshtatshme për zhvillimin e drurëve frutorë, ndërsa Lumi Vjosë mund të përdoret për turizmin e aventurës.
Administrata vendore e bashkisë
Bazuar në të dhënat e publikuara nga Komisioni Qendror i Zgjedhjeve, në datën 21 qershor 2015 në bashkinë e Selenicës kishin të drejtën e votës 27,099 votues. Gjatë zgjedhjeve të fundit lokale, në datën 21 qershor 2015, në këtë bashki votuan gjithsej 11,474 votues, 42.34% e zgjedhësve.
Rezultatet e këtyre zgjedhjeve nxorrën fitues në garën për kryetar bashkie Z. Përparim Shameti i Aleanca Popullore për Punë dhe Dinjitet, me 53.81% të votave.
Rezultatet për subjektet zgjedhore për anëtarë të këshillit bashkiak ishin si më poshtë:
Subjekti zgjedhor |
Vota |
Përqind |
Mandate |
Aleanca për Shqipërinë Europiane |
6598 |
57,76% |
13 |
Aleanca Popullore Për Punë dhe Dinjitet |
4257 |
37,27% |
8 |
Partia Kristian Demokrate e Shqiperise |
345 |
3,02% |
0 |
Partia Socialdemokrate e Shqipërisë |
190 |
1,66% |
0 |
Partia Bashkimi per te Drejtat e njeriut |
33 |
0,29% |
0 |
Bazuar në rezultatet e mësipërme, administrata e re lokale e kësaj bashkie është si më poshtë:
Kryetar Bashkie: Përparim Shameti, Aleanca Popullore për Punê dhe Dinjitet (Kliko këtu për të lexuar CV-në)
Lista emërore e anëtarëve të Këshillit Bashkiak (kliko këtu)